如果你未睇《怪獸與牠們的產地》(Fantastic Beasts and Where to Find Them),而你又好怕劇透,麻煩你Save呢條link,睇完戲先好睇!至於睇咗戲嘅朋友,我哋齊齊研究下到底《怪》同《哈利波特》系列有咩細節關連!
奸角係鄧不利多暗戀對象!
《怪》嘅奸角係真身由尊尼特普(Johnny Depp)飾演嘅黑巫師葛林戴華德(Gellert Grindelwald),雖然大家都知佢會拍續集,但今集見到有佢全院竟然好冷靜,唔驚奇咩?
《哈利波特》 中有提過佢係霍格華茲校長鄧不利多(Dumbledore)後生時嘅好朋友,鄧不利多甚至支持過佢由巫師統治麻瓜世界嘅「理想」,兩個人仲一齊去搵死神的聖物,但後來鬧翻,更間接害死鄧不利多妹妹。
(左邊係鄧不利多,右邊係戴華德,嚟自《哈利波特-死神的聖物1》)
戴華德後嚟偷咗聖物之一:接骨木魔杖,最後喺1945年鄧不利多同戴華德決鬥,鄧不利多勝出,從此戴華德被收監,囚禁喺巫師監獄紐蒙迦德(Nurmengard)。
(戴華德偷接骨木魔杖,咁佢被鄧不利多打敗,接骨木魔杖使用權就歸鄧不利多擁有。後生戴華德幾好樣。)
(佛地魔探戴華德監,戴華德老咗咁樣嘅。)
其實喺2010年上映嘅《哈利波特-死神的聖物1》(Harry Potter and the Deathly Hallows – Part 1),就有段佛地魔(Voldemort)去紐蒙迦德搵戴華德,問佢接骨木魔杖下落嘅情節。
Link:https://www.youtube.com/watch?v=DsAXmyI8GVo
(呢幕當年嚇親我,不過睇老婆婆面色同咁浮腫都知有問題㗎嘞。)
戴華德張相仲出現過喺魔法史學家芭蒂達巴沙特(Bathilda Bagshot)間屋,因為芭蒂達係佢auntie。唔記得邊個係芭蒂達?喺《哈利波特-死神的聖物1》被佛地魔條蛇上身,一直扮人等哈利波特出現嗰個女人呀。
另外《哈利波特》系列作者J. K. Rowling早於2007年已承認鄧不利多係同性戀者,佢嘅暗戀對象正正就係戴華德!《怪獸與牠們的產地2》(整個系列將會有5集)將會出現後生版鄧不利多,所以劇情應該會圍繞佢同戴華德點實現巫師革命同最終決裂。
艾迪烈柏尼 (Eddie Redmayne)飾演嘅主角紐特斯卡曼德(Newt Scamander)有張人像相非常珍惜,相中人叫莉塔雷斯壯(Leta Lestrange),係佢喺霍格華茲讀書時嘅好朋友。
(喜歡Helena Bonham Carter癲喪嘅演出,佢一出現就令人好嬲,覺得實無好嘢發生。)
Fans們應該記得雷斯壯(Lestrange)呢個姓,因為殺死哈利波特教父天狼星(Sirius Black)同小精靈多比(Dobby)嘅食死人(Death Eater)女巫,就叫貝拉雷斯壯(Bellatrix Lestrange)。佢殺完天狼星仲唱返句「I killed Sirius Black」,演Bellatrix嘅海倫娜寶咸卡達Helena Bonham Carter演得好出色。
Bellatrix姓Lestrange係跟夫姓,Leta Lestrange的確係同家族嘅人,導演話呢個角色喺嚟緊幾集會有更多戲分,起碼唔再係一張相啦。
死神的聖物標誌頸鏈
(《怪》海報上已經有死神的聖物標誌頸鏈,其實Colin Farrell係由Johnny Depp假扮。)
(《哈利波特-死神的聖物1》中Xenophilius Lovegood呢條只係裝飾,無平安鐘效果。)
戲中出現過死神的聖物標誌頸鏈有平安鐘功能,只要戴緊嘅人摸下個logo,戴華德就知有人搵佢。同款頸鏈喺《哈利波特-死神的聖物1》都出現過,由哈利波特同學仔露娜羅古德(Luna Lovegood)個爸爸Xenophilius Lovegood持有,佢仲同哈利波特解釋咗咩叫死神的聖物。
戴華德非常想得到死神的聖物,而其中嘅隱身斗篷,一直由哈利波特嘅家族擁有,所以喺之後《怪》嘅續集,我哋可能有機會見到哈利波特嘅祖先都未定。
值得一提露娜最後嫁咗俾紐特個孫羅夫(Rolf Scamander),兩個人都同紐特一樣係神奇動物學家,喺世界各地發現咗好多神奇怪獸。
紐特曾經出現過喺地圖上面!
眼利到離譜,竟然有人發現《怪》主角紐特曾經喺2004年嘅《哈利波特:阿茲卡班的逃犯》(Harry Potter and the Prisoner of Azkaban)出現過!
呢張有魔法嘅劫盜地圖(Marauder's Map),可以顯示霍格華茲學校入面所有人嘅活動,中間有「Newt Scamander」呢個名喺學校入面行!紐特1897年出世,《阿茲卡班的逃犯》故事設定喺1993至94年,即係紐特已經97歲高齡,不過鄧不利多嗰時都113歲啦,仲好活躍,係咪先?
其實仲有好多關連,有排寫,等我睇返晒《哈利波特》再寫過,多謝收睇。
Nox!(熄滅魔法杖光芒嘅咒語)